ఆందోళన వద్దు

రంగం ఏదైనా విజయం సాధించడానికి సరైన మార్గం అవసరం. మనమెంత ఎత్తుకు ఎదుగుతామనేది మన జీవితం పట్ల మనకున్న దృక్పథాన్నిబట్టి ఉంటుంది. మనసులో రూపొందించుకున్న ఆశలు, ఆశయాలే జీవిత గమ్యాన్ని నిర్దేశిస్తాయి. ఆలోచనలు సక్రమమైనపుడే మేధస్సు వికసిస్తుంది. ఒక మంచి ఆలోచన మనకు తట్టినపుడు దానిని పదే పదే మననం చేసుకోవాలి. చెడు ఆలోచనలను అదుపు చేయటం ముఖ్యం. అయితే... ఇది అంత సులభమేమీ కాదు. అయినా ప్రయత్నిస్తూనే ఉండాలి. బిజీ లైఫ్‌తోనే ఇది సాధ్యం. నిరంతరం పనిచేస్తూంటే మనసుకు, అందులో చెలరేగే ఆలోచనలకు స్థిరత్వం ఉంటుంది. అప్పుడే మె రుగైన జీవితానికి ఉపయోగపడే కొత్త కొత్త ఐడియాలు పుట్టుకొస్తాయి. వాటిని అప్పటికప్పుడే మరచిపోవద్దు. దాన్ని ఆచరణలో పెట్టే దాకా నిరంతరం నెమరేసు కుంటూనే ఉండాలి. అంతేకాదు.. ఐడియాలపై ఎప్పటికప్పుడు రివ్యూ చేయాలి. వాటిని కార్యరూపం దాల్చడానికి ఎదురయ్యే సాధ్యాసాధ్యాలను సమీక్షించు కోవాలి. ఎంతటి కఠినమైన పనినైనా చేయడానికి సిద్ధపడాలి.
స్థయిర్యాన్ని కూడగట్టుకున్నప్పుడే అసాధ్యం సుసాధ్యమవుతుంది.
మన పనికి ఎవరో ఆటంకం కలిగిస్తారని ముందుగానే ఊహించు కోవడం కన్నా పరికితనం మరొకటి లేదు. ఇలా చేస్తే ఎవరో ఎందుకు..? మనకు మనమే అడ్డంకులు సృష్టించుకున్నట్టు. ఆగధాలను, ప్రమాదాలను అధిగమిస్తేనే విజయం.

మానసిక సంఘర్షణకు కారణం?

దైనందిన జీవితంలో చాలామంది మానసిక ఒత్తిడికి గురవుతుంటారు. ఏదైనా కొత్త పనిని ప్రారంభించాలన్నా, ఆఫీసులో కొత్త ఆలోచనలను ఆచరణలో పెట్టాలనే ఒకటే టెన్షన్‌. అది సక్సెస్‌ అవుతుందో.. లేదో అనే భయం. ఇది మాత్రం శ్రేయస్కరం కాదు. దీని నుంచి బయటపడితేనే అనుకున్న పని సజావుగా సాగుతుంది. అనవసరపు భయాందోళనలు పెట్టుకుని మన లక్ష్యాన్ని మనమే నీరుగార్చుకోవద్దు. ఆటుపోట్లు ఎదురవుతాయని ఊహించుకుంటే ఒక్క అడుగూ ముందుకు వేయలేం. ఎంతటి క్లిష్టపరిస్థితులనైనా ఎదుర్కొని అనుకున్న పనిని పూర్తి చేస్తాననే మనోధైర్యం కలిగి ఉంటేనే ఏదైనా సాధించుకోగలం. చేయగలమా.. లేదా..? అనే మానసిక సంఘర్షణ వల్ల ప్రతికూల పరిస్థితులే తప్ప ప్రయోజనమేమీ ఉండదు. దీన్ని జయించినప్పుడే విజయం వైపు అడుగులు పడతాయి.